Ahm affay sorry ken

ah've jist been hayin' a geck at ma past posts on doric an ah found a comment fae a man that runs the scots wikipedia site an it turn oot that it's mastley in doric - ah must've nae been affay guid at readin' it ken. so ah jist winted tay pit the record straight an also to thank Dereck fir commenting and pitting me richt - ah wid love tay tak up his offer oh jinin 'em bit ah'm nae affay guid at figurin' oot the wiki thingy (there's een fir N'awlins thit ah cannay de either) so ahm hopin he'll forgive this daft quiney her misreadin' an he'll keep up the guid work!!

Here's his comment:

Maist o the fowk contreebutin tae the Scots Wikipedia are aether Doric spikkers, Borderers or Scots lairners. "Central Belters", eejits or itherwise, dinna seem tae be sae interestit in warkin on it, tho there are ane or twa. A'm ane o the foonders an contreebutors an, like yersel maist o ma faimlie on baith sides are Doric spikkers at hame, sae whan A pit onythin in the Wikipedia A've nae chyce but tae pit it in Doric syne A dinna ken onythin else. Whit micht be leadin ye astray is that aw the Wikipedia editors contreebute wi the ae staundard Scots spellin. Sae if ye didna ken the richt wey tae sey "wh" or "i" in Doric, ye micht think that A wis writing in Central Scots. I can assure ye, that if ye heard me reading the airticle oot lood, ye'd hae little doot that the maist o the Scots Wikipedia wis written in Doric. The lave o't is quasi-Scots written by Scots lairners and needs reddin up but nae apolgies. We're short o fowk that can contreebute at ony level and we're nae sae prood but that we'll tak wha we can get.

In fact we're aye aifter mair contreebutors that can actually spik Scots, (Doric spikkers by preference since Doric is the healthiest Scots dialect an it's far mair likely that Doric spikkers actually ken the richt wey tae spik Scots), sae if ye dinna like the wey that we're daein things ay noo, we'd be richt glad if ye'd jine us and help tae set things richt.

Cheers

Derek Ross